Sámiráđđi lea juolludan jagi 2021 kulturdoarjagiid

Sámiráđi kulturlávdegoddi leat dál juolludan prošeaktadoarjagiid, bargo- ja Ruovttu residency stipeanddaid 2021 várás.

Olu ohcamušat miehtá sámis, maiddai ruošša bealde sámis

Sámiráđđi juohká jahkásaččat ruhtadoarjagiid sámi kulturdoaimmaide ja lea rájáidrastideaddji ruhtadanvuogádat mas sámi dáiddáriin ja kulturbargiin lea seamma vejolašvuohta ohcat beroškeahtta gos Sámis leat eret. Ohcamušat lassánit jagis jahkái, ja erenoamažit vuohtit stuora dárbbu bargostipeandaide.

– Oaččuimet dán jagi maid olu ohcamušaid miehtá sámis, sihke sámi servviin, dáiddáriiguin, festiválaiguin jnv. Kulturdoarjagiid bokte mii háliidit doarjut sámi viidát ja sisdoallu dáin iešguđet prošeavttain lea sihke árbediehtu, giella, dáiddá, musihkka, filbma earret eará. Juohke jagi leat ohcamušat maiddai ruošša bealde sámis, muhto dán jagi ledje boahtan erenoamaš olu ohcamušat Ruošša bealdi buot doarjjaortnegidda, mii dieđusge lea hui illudahtti. Mii oaidnit stuora dárbbu oktasaš sámi doarjjaortnegiidda, dadjá Kulturlávdegotti jođiheaddji, Asta Mitkijá Balto. 

Čakčamánu álggus fálaimet sámi dáiddáriidda ja kulturbargiide miehtá Sámi ohcat kulturdoarjagiid 2021 doaimmaide. Sámiráđđi oaččui 83 prošeaktadoarjjaohcamuša ja 62 bargo- ja Ruovttu residency stipeand ohcamuša, oktiibuot 14.000.000 NOK ovddas. Kulturdoarjaga ulbmil lea nannet árbevirolaš ja ođđaáigásaš sámi kultuvrra ja dáidaga, ja doarjja vuoruha earenoamážit prošeavttaid mat dihtomielalaččat fátmmastit olles Sámi perspektiivva. Kulturlávdegoddi juolludii 42 prošektii 955.000 NOK boahtte jáhkai.

Ruovttu residency bargostipeanddaid

Sámiráđđi ásahii 2021 jáhkai ođđa doarjjaortnega gos sámi kulturbargit ja dáiddárat sáhtte ohcat 3 mánnosaš Ruovttu residency bargo stipeandda. Ulbmil stipeanddain lea addit sidjiide áiggi ovdanahttit bargguid koronavirusa hástaleaddji áiggis. 

Balto čilge ahte dávjá lea dehalaš oassi artistta barggus beassat ovdanit dáiddálaččat maiddái ságastallamiid bokte eará dáiddáriguin, muhto korona dilis gárččui vejolašvuohta  ja gárte olu akto bargat.

– Lea movttidahtti go diehta ahte earát maid leat barggame seamma áiggis go son ieš, jurddašeame, praktisereme ja geahččaladdame. Dáinna Ruoktu residency ortnegiin hálideimmet láhččit vejolašvuođa ovdanahttit dáiddálaččat, ja láhčit vejolašvuođa ovttasbargat eará dáiddáriguin. Ledje dás ge olu ohccit miehtá sámis, dadjá Balto. 

Sámiráđđi juolludedje 5 Ruoktu Residency bargostipeandda 2021 giđđii ja sii geat oččo ledje Sami Ásllat Laiti (duodji), Ingir Ane Bål (filbma), Carola Grahn (dáiddá), Valentina Vyacheslavovna Sovkina (árbediehtu) ja Vitaly Nikolaevich Sapelnikova (duodji).  

Ruoktu residency bargostipeanda dáiddáriidda ja kulturbargiide Ruoŧa, Suoma ja Norgga bealde lei 90.000 NOK guhtege ja Ruošša beallai lea 30.000 NOK guhtege.  

Fredrik Prost, Anna Sapelnikova ja Ánna-Katri Helander ožžo bargostipeandda

Sámiráđi juohka juohke jagi golbma bargostipeandda áigeguovdilis dáiddáriidda dahje kulturbargiide sámis. Kulturlávdegotti jođiheaddji, Asta Mitkijá Balto, oaidna ahte lea stuora dárbu bargostipeanddaide sámis, erenoamžit dál go kulturbargit ja dáiddárat leat erenoamaš váttis diliin go leat unnit vejolašvuođat fitnet sisaboađu go dábalaččat.

– Ledje boahtan hirbmat olu buorit ohcamat miehtá Sámis ja vuoruheapmi ii lean álki. Diehtit ahte mis leat beare unnan bargostipeanddat Sámis ja diehtit maid ahte bargostipeanda lea dehalaš gáldu ja doarjja dasa ahte bállehit dáiddáriid ovdánahttit dáiddálaš bargguideaset. Mii duođaid sávvat ahte Sámeráđi bargostipeanda buktá bargomovtta ja buriid vejolašvuođaid boahtte jáhkai sidjiide geat oččo dan, dadjá Balto.

Sii geat oččo bargostipeandda jáhkai 2021 ledje Fredrik Prost (duodji) ja Ánna-Katri Helander (Dánsun ja lávdebargu) geat oaččuiga 200.000 NOK goabbáge, ja Anna Sapelnikova (Árbediehtu) gii oaččui 100.000 NOK.  

Sii geat ožžot jagi 2021 bargostipeandda:

1. Fredrik Prost “Govadas-Goabdes-Gåbdá-Gievrie” (duodji),

2. Ánna-Katri Helander “Dánsun ja koreograferen” (dánsa)

3. Anna Sapelnikova "Charr" - "Tundra" (árbediehtu)

Sii geat oččo Ruoktu Residency bargostipeandda 2021:

1. Sami Ásllat Laiti (duodji)

2. Ingir Ane Bål (filbma)

3. Carola Grahn (dáiddá)

4. Valentina Vyacheslavovna Sovkina (árbediehtu)

5. Vitaly Nikolaevich Sapelnikov (duodji)

Prošeaktadoarjagat 2021