- Kárášjoga álbmoga vuoigatvuođat leat deháleabbot go FeFo beroštumit
Sámiráđđi doarju Finnmárkkukommišuvnna konklušuvnna, ja oaivvilda ahte FeFo-direktevrra áššeovdanbuktin njuolgut rihkku álbmotrievtti. – Čuovvovaččat berre baicce deattuhit proseassa Kárášjotálbmoga oamasteami ektui dáid guovlluide, ii ge sihkkarastit Finnmárkkuopmodaga iežas beroštumiid, dadjá Sámiráđi jođiheaddji Christina Henriksen.
Sámiráđđi lea sádden gulaskuddancealkámuša FeFo direktevrra evttohuvvon áššeovdanbuktimii Finnmárkkukommišuvnna (FMK) oasseraportta Kárášjotguovllu ektui. FeFo stivra galgá meannudit ášši skábmamánu 25. beaivvi 2020.
Gulaskuddancealkámušas Sámiráđđi deattuha dan mii min áddejumi mielde lea vuođđun FeFo direktevrra konklušuvnnaide áššeovdanbuktimis, nammalassii muhtin lágan jurddašuvvon riektenjuolggadus das makkár eanan- ja geavahanvuoigatvuođat sámi báikkálaš servodagain, ovttaskas olbmuin ja FeFos leat ja galget leat Finnmárkku eatnamiidda, čáziide ja luondduriggodagaide.
“Mii mearkkašat ahte FeFo hálddáhusas lea vuosteháhku dohkkehit Finnmárkku vuoigatvuođad kártema, mii čađahuvvo seamma lága mielde mii lea ásahan Finnmárkkuopmodaga. Mii eat sáhte áddet eará go ahte direktevrra cealkámuša vuođđun leat politihkalaš oavilat eai ge juridihkalaš veardideamit. ”
Sámiráđi árvvoštallama mielde ii doala direktevrra áššeovdanbuktin dási Norgga gustovaš lágaid ektui, ja jus dan árvvoštallá álbmotrievtti ektui, de áššeovdanbuktin manná njuolgut álbmotrievtti vuostá. Direktevra čujuha nu gohčoduvvon cieggan riektedillái, muhto Sámiráđđi deattuha ahte ii leat doarvái ahte stáhta, dahje FeFo, oaivvildit sii dat leat omasteaddjit dahje ahte sis dat leat geavahanvuoigatvuođat, ja nu sihkastit eret sámi vuoigatvuođaid, nuppiin sániiguin rievdadit vuoigatvuođadili. Dan eai sáhte dahkat Kárášjogas, eai ge eará guovlluin.
Sámiráđđi čujuha Ruoŧa Alimusriektái mii, Girjas duomu oktavuođas, deattuhitt ahte jus sámi vuoigatvuođaid eatnamiida, čáziide ja luondduriggodagaide galgá sihkkut, de dat eaktudivčče “čielga” ja “”definitiiva” láhkaásahusa.
– Mii mearkkašat ahte FeFo hálddáhusas lea vuosteháhku dohkkehit Finnmárkku vuoigatvuođad kártema, mii čađahuvvo seamma lága mielde mii lea ásahan Finnmárkkuopmodaga. Mii eat sáhte áddet eará go ahte direktevrra cealkámuša vuođđun leat politihkalaš oavilat eai ge juridihkalaš veardideamit. Sámiráđi divvu gažáldagaid das ahte lea go FeFo direktevrras mandahta ieš dahkat dákkár veardidemiid, ja imaštallá go direktevra manná iežas stivrra meaddil ja dán láhkai sádde iežas jurddašemiid gulaskuddamii ovdal go dat leat stivrras meannuduvvon, loahpaha Henriksen.
Olles Sámiráđi gulaskuddancealkámuša sáhttá dáppe lohkat.
