Almmuhus: Álgge oahpahallin Sámiráđđái!
Govven: Piera Heaika Muotka / Sámiráđđi
Beroštat go sámi áššiiguin bargat? Geasuhit go riikkaidgaskasaš barggut du? Háliidat go bargohárjáneami sámi birrasis? Sámiráđđi rahppá dál ollesáigge bálkáhuvvon oahpahalli virggi mii bistá 6 mánu, vejolašvuođain guhkedit 12 mánnui.
OHCANÁIGEMEARRI:
25.11.2025
Mii ohcat doaimmalaš olbmo, geas lea beroštupmi ja gelbbolašvuohta ovddidit sámi kultuvrra riikarájáid rastá. Máhttu sámi servodaga birra deattuhuvvo. Dasa lassin deattuhuvvojit ovttasbargan- ja gulahallanattáldagat, dás maiddái čálalaš ovdanbuktinnávccat, návccat bargat iehčanassii ja ulbmillaččat ja veahkkáivuohta. Oahpahallin don beasat oahpásmuvvat min organisašuvdnii, sámi siviilaservodahkii ja oaččut bargat sihke hálddahusbargguid ja eará bargguid mat gullet Sámiráđi bargosurggiide. Bargui gullet muhtin ráje mátkkošteamit.
Bargobáiki lea Sámiráđi čállingottis Kárášjogas.
Bálká ja álgin lea šiehtdusa mielde.
Sádde iežat ohcamuša dán čujuhussii:
saamicouncil@saamicouncil.net
ovdal 25.11.2025. Merke ohamuša ”Oahpahalli”.
Eanet dieđuid addá Sámiráđi váldočálli Áile Jávo:
Tlf. +47 950 25 926
E-poasta: aile.javo@saamicouncil.net
Sámiráđđi lea eaktodáhtolaš, sorjjasmeahttun kultuvrralaš ja politihkalaš ovttasbargoorgána sámi organisašuvnnaide Suomas, Norggas, Ruoššas ja Ruoŧas. Váldoulbmilin lea gozihit sámiid vuoigatvuođaid ja beroštumiid oktan álbmogin ja nannet sámiid oktiigullevašvuođa riikkarájiid rastá. Ráđđi bargá maiddái riikkaidgaskasaččat ovddidit ja suddjet sámiid ja eará álgoálbmogiid vuoigatvuođaid. Das leat njeallje ossodaga: Árktalaš ja birasáššit, olmmošvuoigatvuođat, kultuvra ja EU-áššit.