Almmuhit neahttaportála man bokte eastadit sámevaši
Šearbmagovva: Suodji.no. Portála lea gávdnamis ođđajagemánu 23. b.
Neahttaportála Suodji/Suodje/Suaja almmuhuvvo Romssa sámi viesus ođđajagemánu 23. beaivve dii. 18.00. Neahttaportálas galgá leat bagadanbálvalus ja doaibmat máhttoportálan mii galgá eastadit minoritehtastressa, sámevaši, ovdagáttuid ja psyhkalaš váttuid sámi servodagas.
Prošeavtta lea Sámiráđđi čađahan ovttas máŋgga ovttasbargoguimmiin geat leat mielde prošeavtta resursajoavkkus. Resursajoavkkus leat leamaš mielde SÁNAG, Máttasámi dearvvašvuođafierpmádat, Dásseárvoguovddáš KUN, NBR, Noereh, Garmeres, Máttasámi searvegoddi, Bufdir, Našunála gealbobiras vašširihkolašvuođas, Politiija, Barentsčállingoddi, Sámi ja álgoálbmotdutkamiid guovddáš Davvi Universitehtas. Prošeavtta leaba ruhtadan Bufdir ja Sámediggi, ja Hanne Svinsås Magga lea dan jođihan.
Prosjektleder for Suodji/Suodje/Suaja, Hanne Svinsås Magga. Foto: Privat
– Suodji/Suodje/Suaja lea ráhkaduvvon njuolggo vástádussan sámi servodaga čielga dárbbuide. Ollugat vásihit hástalusaid dustet sámeváši, oktan eahpesihkarvuođain das mo sáhttá dieđihit loavkašuhttimiid ja bidjat rájáid árgabeaivvis. Suodji/Suodje/Suaja addá rávvagiid, máhtu ja searvevuođa vai sáhttá dustet dáid hástalusaid, čilge Magga.
Portála galgá addit sápmelaččaide ja earáide vejolašvuođa fidnet sihkkarastojuvvon dieđuid ja reaidduid nannen dihtii sámi identitehta ja máhtu sámiid birra. Neahttaportála geavaheaddjit gávdnet dieđuid sámi kultuvrra, giela, dearvvašvuođa, ealáhusaid, dutkama ja historjjá birra.
– Ovttas neahttaportálain almmuhuvvo maiddái chattenbálvalus. Dat dahká vejolažžan sidjiide geat vásihit sámevaši oažžut rávvagiid ja bagadallama. Chattabargit galget leat mielde mearriduvvon rahpanáiggiid, muhto geavaheaddjit sáhttet sáddet dieđuid vaikko goas ja oažžut vástádusaid rahpanáiggis, joatká Svinsås Magga.
Almmuhanlágideapmi lea ođđajagimánu 23. b. dii. 18:00 Sámi viesus Romssas. Prográmmii servet Sámedikki ráđđelahttu Runar Myrnes Balto, Elle Nystad (ovddeš Doarvái Dál prošeaktajođiheaddji), Torjer Olsen (SESAM), Jill Abelsen Olsen (Sámi Viesu jođiheaddji Romssas) ja prošeaktajođiheaddji Hanne Svinsås Magga. Šaddá maiddái dáiddalaš oassi. Lágideapmi lea ovttasbargu gaskal Sámiráđi, Romssa sámi viesu ja Sámi dutkamiid guovddáža - SESAM.
Eanet dieđut dás: Facebook event.