Dásseárvopod - Podda mii hupmá Sámi sohkabealis ja dásseárvvus
Govva Lávdan Sámi Arenas, gos Ánndaris Rimpi humai sámi dievddu ja dievdovuođa birra.
Gos leat dat sámi dievddut? Sáhttit go mii hupmat ođđaáigásaš, queer Sámi historjjá birra? Makkár dilli lea eamiálbmotfeminismmas dál? Dát leat moadde dain gažaldagain maid Anne Wuolab jearrá Dásseárvopodis - ođđa podda mas guorahallá fáttáid mat gasket sohkabeallái ja dásseárvui Sámis dál.
ReCap ASáp: Regaining capacity in a changing Sápmi ovdánbuktá ođđa podkast-ráiddu mii geahčada iešguđetlágan fáttáid mat gusket sohkabeallái Sámis.
“Sohkabealli ja dásseárvu lea fáttát maid birra lea álo dehálaš hupmat, maiddái odne, ja das leat máŋga beali. Dán poddas mii loktet ovdan perspektiivvaid mat eai álo oaččo saji, muhto mat leat dehálaččat min servodaga ovdáneapmái,” dadjá Anne Wuolab, gii lea poddaid jearahalli.
Oassin Interreg Aurora ruhtada prošeavttas ReCap ASáp, leat guhtta iešguđetlágan máhttojoavkkuid bovden diehtoguddiid ja áššedovdiid digáštallat fáttáid mat leat relevánta sámi siviila servodaga ovddideapmái. Okta dáin máhttojoavkkuin lea gieđahallan sohkabeliid Sámis, ja dan lea Anne Wuolab jođihan. Dásseárvopod lea dán máhttojoavkku boađus.
Čieža oasis bovde Anne diehtoguddiid ja áššedovdiid ságastallamii sohkabeali ja dásseárvvu birra min otná servodagas. Fáttát nugo sámi dievdu, dásseárvu boazodoalus, ja sámi sohkabealdutkan leat áššit mat váldojuvvojit ovdan, ja mat maiddái leat fáttát mat leat dehálažžat sámi servodaga ovddideapmái.
Anne Wuolab, poddaid jearahalli
“Ságastallamat maid mii leat doallan máhttojoavkkuin čájehit ahte álo lea dárbu hupmat dáid fáttáid birra Sámis” dadjá Anne, ja sávvá ahte podkast veahkeha ságastallama Sámi sohkabeliid ja dásseárvvu birra joatkašuvvet maiddái almmolaš lanjain.
Podkastas leat čieža oasi. Bihtát leat juogo davvisámegillii dahje ruoŧagillii/dárogillii, ja oanehis, čálalaš oktiigeassu eará gielaide lea fidnemis.
Dievddut ja dásseárvu, guossi lea Lasse Valkeapää
Dutkan sohkabeliid birra Sámis, guossi lea Torjer Olsen
Nisson boazodoalus ja dásseárvu, guossi lea Marianne Ketola
Luohttámusdoaibma dásseárvui, guossi lea Christine Olsén-Nikkinen
Queer sápmelaš ja dásseárvu, guossi lea Tatjana Kolpus
Sámi queerhistorjá ja dásseárvu, guossi lea Elisabeth Stubberud
Álgoálbmot feminisma ja sámi sohkabealvuogádat, guossi lea Rauna Kuokkanen
ReCap ASáp: Regaining capacity in a changing Sápmi prošeavtta lea ruhtadan: Interreg Aurora, Norgga Sámediggi, Lapin Liitto, Regionene Jämtland Härjedalen, Norrbotten, Västerbotten ja Västernorrland, fylkasuohkanat Trøndelag, Nordland, Troms ja Finnmark