Bagadusdokumeanta "Etihkalaš dutkanovttasbarggu árktalaš dutkamis" geahččala ovddidit eanet oktasaš hábmema ja ovttasbarggu dutkamis
Govva: Jannie Staffanson
Ikaarvik ja Research Institute for Sustainability (RIFS) leat ovttas Sámeráđiin ráhkadan bagadallandokumeantta etihkalaš dutkanovttasbarggu árktalaš dutkamis (Ethical Research Collaborations in Arctic Research) , mii lea oassi Njuolla → Qarjuk prošeavttas.
Dutkan mii lea ovttasbarggus gaskal eamiálbmot- ja ii-eamiálbmotovttasbargoguimmiid dahkkon addá dávjá buoret ja eanet relevánta dutkamiid. Dán dokumeantta ulbmilin lea dasto láhčit eanet oktasaš hábmema ja ovttasbarggu eamiálbmot- ja ii-eamiálbmotguimmiid gaskka dutkamis, ovddemuš Árktisas.
“Dát bagadus ii ásat ovtta áidna lahkoneami, muhto baicce deattuha guldalit servodaga ja árvvusatnit sin eallinvugiidi ja dárbbuid.”
Muhtun eamiálbmotservodagat leat ásahan dutkanetihkalaš njuolggadusaid, muhto eai buot servodagat leat ráhkadan dahje almmuhan dutkanetihkalaš njuolggadusaid. Dat sáhttá dagahit ahte dutkiide lea váttis diehtit gos ja movt sáhttet álggahit ovttasbargoproseassa. Dát dokumeanta galgá de leat bagadussan ja doarjjan dutkiide sin barggus eamiálbmotservodagain, ja sihkkarastit ahte dutkan čađahuvvo árvvusatnimiin, rabasvuođain, ja ulbmillaš ovttasbargguin. Lea maid dehálaš muitit ahte jus muhtun servodagain leat juo iežas dutkannjuolggadusat, de dat mannet ovdalii go obbalaš dieđut dán dokumeanttas.
Njuolla → Qarjuk prošeavtta oassin galgá maiddái lágiduvvot neahttavuđot diehtovuođđu mas leat etihkalaš njuolggadusat árktalaš eamiálbmotorganisašuvnnaid várás, vai dutkit ja dutkanprošeavttat sáhttet daid atnit veahkkin go áigot eanet čanastit iežaset álgoálbmotservodagaide.