Jevgenij Jushkov muitun
Jevgenij Jushkov, Tråante 2017
Sámiráđđái bođii diehtu min kollega Jevgenij (Zhenya) Jushkov fáhkka ja issoras surgadis jápmimis. Min guhkes áiggi kollega ja ustit rieviduvvui fastte láhkái eret min máilmmis. Min jurdagat ja min fuola leat su lagamusaid luhtte, Vika, Katya, Áilu (Oleg), ja sudno lagašolbmot.
Zhenya ráfalaš ja vuogaš luondduin, su movttain ja humoriin son šattai ustit eará sámiiguin, Vilgesábi rájis nuortan gitta Svahke rádjái máddin. Ruošša bealde leai Zhenya oahpis masa buot sámiide, ja eanaš oassi sámiin geat áŋgirušše sámi oktsašbargui dihtet bures gii son leai. Giellaolmmožin son hálddašii máŋga giela ja dakko bokte sus ledje oktavuođat oalle ollugiin. Vaikko son leai oasálastán, ja bargan dulkan logatmeahttun čoahkkimiin son leai oalle várrogaš hubmat su politihkalaš oainnu birra. Dattege lea eahpitkeahttá nu ahte su váimmu siskimus čiegás lea sámegiella, Ruošša beali sámit ja sámiid oktasašbargu.
“Jevgenij Jushkov haga lea Sápmi šaddan geafibut. Son lea leamaš dehálaš geađgejuolgi ja láidesteaddji sámiid oktasašbargui riikkarájiid ja giellarájiid rastá, oasit mat ain ge eastadit min gullahalama gaskaneamet.”
Jevgenij logai sámegiela Kárášjogas ja Guovdageainnus. Ja das maŋŋá son dulkkai sámi čoahkkimiin ja eará doaluin 25 jagi áiggi. Son leai dat okta guhte máhtii dulkut davvisámi ja ruoššagiela gaskkas ja sus leai erenoamáš máhttu organiseret dulkumiid ja ráhkadit gulahallanvugiid, beroškeahttá das makkárat geavatlaš eavttut ledje. Sámiráđi barggu bokte, Barents oktasašbarggu bokte ja eará sámi organisašuvnnaid ja ásahusaid doaimmain son leamaš olis ráhkadeami lagaš oktavuođaid ruošša beali ja Davviriikkaid sámiid gaskkas.
Jevgenij Jushkov haga lea Sápmi šaddan geafibut. Son lea leamaš dehálaš geađgejuolgi ja láidesteaddji sámiid oktasašbargui riikkarájiid ja giellarájiid rastá, oasit mat ain ge eastadit min gullahalama gaskaneamet. Jevgenij maŋis báhcá stuorra guorusvuohta, muhto seammas doaivut su stuorra beroštumi ja áŋgiruššama gilli ja gulahallamii movttiidahttit earáid guorrat su luottaid.
Lehkos ráfi Jevgenij Jushkov muittus!
Christina Henriksen,
Sámiráđi ságadoalli
Min buorre bargoustit Jevgenij Jushkov vádjolii skábmamanu 29. beaivvi 2020. Bearaš Lujávrris bázii moraštit iežaset áhči, ádjá ja isida. Sámiráđđi háliida doarjut bearraša dán lossa áiggis. Vuollegašvuođain mii danin álggahat ruhtačoaggima gos sii guhte háliidit sáhttet skeŋket ruđa bearrašii ja mánáid boahtteáigái. Buot ruhta manná ollásit bearrašii.
Jus háliidat skeŋket, de sáhtat sirdit ruđa ovtta dáid báŋkokontoide:
Norga: 4901 16 68894
Ruoŧŧa: 119 98 70-5 (SE65 9500 0099 6042 1199 8705)
Suopma: FI41 1353 3000 0024 23
Ruošša: 4276 8410 4722 1680