Sámiráđi sárdni Sámedikki ovccát áigodaga rahpamis
Sártni doalai Sámiráđi presideanta Per-Olof Nutti. Govven: Peter Steggo
Sámiráđi presideantta Per-Olof Nutti sárdni Ruoŧabeal Sámedikki 9. mandáhtaáigodaga rahpamis skábmamánu 26. beaivvi.
Majestehta Gonagas, Sámedikkid jođiheaddjit, Ruonáeatnama parlameantta jođiheaddji, Ruoŧa riikkabeaivvi ovddasteaddjit, Eananhearrá, Bispa,
Munnje lea stuorra gudni beassat didjiide buktit Sámiráđi dearvvuođaid Sámedikki ovccát áigodaga rahpamis, ja seammás sávan válljejuvvon sámediggeáirasiidda lihku dan dehálaš bargui.
Mii čoahkkanit duođalaš áiggis. Mii oaidnit ahte máilmmis lassána ráfehisvuohta. Dát eahpesihkkarvuohta ii bisán stáhtaid rájiid siskkobealde, muhto guoská maiddái min sámi servodagaide. Geopolitihkalaš riiddut, dálkkádatrievdamat ja sisabahkkemat čuhcet eanet aht eanet min ealáhusaide ja min kultuvrii.
Dát áitta hástala min. Dat gáibida ahte mii fertet nagodit boahttevaš bálgáid duolbmat ráhpis duovdagiin. Mii fertet ovttas gávdnat geainnu ja čovdosiid dasa ahte mo dustet dáid hástalusaid – eat fal juohkásan joavkun juohke riikkasteamet, muhto oktan álbmogin.
Danin go mii sámit leat okta álbmot. Mis lea oktasaš historjá, kultuvra ja giella, ja mii eallit eatnamiin ja guovlluin mat gullet sámi álbmogii ja maid mii sámit leat oamastan ja hálddašan áiggiid čađa ovdal stáhtaásahemiid.
Dattetge váikkuhit stáhta vuogádagat ja struktuvrrat min beaivválaš bargui. Rámmaeavttut, ruhtadeapmi, lágat ja bušeahtat dagahit dávjá ahte mii giddet fuomášumi dušše daid áššiide mat gusket min bealde ráji. Riikkavuogádaga luondu lea háddjet ja earuhit. Muhto min bargu lea oaidnit ollisvuođa. Min bargu lea oaidnit Sámi.
Ráhkis sámedikkeáirasat. Dii lehpet ožžon nana luohttámuša sámi jienasteddjiin dán bealde Sámis. Dán luohttámuša galgabehtet rámiin guoddit. Muhto mun bivddán din bajidit čalmmiideattet.
Álbmotválljen áirrasin dii lehpet maiddái ofelaččat min oktasaš boahtteáigái. Dii lehpet dehálaš láidesteaddjit, ehpet dušše Ruoŧabeal sápmeláččaide, muhto olles Sápmái. Go dahkabehtet mearrádusaid ja hábmebehtet politihka, de bivddán din muitit ahte din jienat galget dávistit guhkkelii go riikarájiid rádjai.
Sámiráđi ja sámi siviilaservodaga bealis sávan diidjide vel oktii lihku dehálaš bargguin.
Ollu giitu!