Sápmái Buorrin – huksemin Sámi fitnodagaid boahttevuođa
Sápmái Buorrin joavkkus leat prošeaktajođiheaddji Enni Similä (SU) ja prošeaktabargit Emmi Nuorgam (SU), Sanne-Ristin Bengtsson (RU), Johanna Tjäder (RU) ja Mariann Josefsen (NO), geat barget riikarájiid rastá miehtá Sámi.
Govven: Sámiráđđi
Ođđa rájáidrasttideaddji fidnu lea álggahuvvon nannen dihtii duojáriid ja sámi fitnodagaid oinnolašvuođa, máhtolašvuođa ja márkanvejolašvuođaid. Suoma Sámiid Guovddášsearvi (SSG), Sámiráđđi ja Sámi Duodji - Sameslöjdstiftelsen čađahit prošeavtta Sápmái Buorrin - huksemin Sámi fitnodagaid boahttevuođa man leat ruhtadan Interreg Aurora ja mielruhtadeaddjit Norggas, Ruoŧas ja Suomas.
Enni Similä, prošeaktajođiheaddji Sápmái Buorrin prošeavttas Govven: Sámiráđđi / Kristoffer Hætta
Vástidit áigeguovdilis hástalusaide
Prošeaktaguoimmit geahččalit gávdnat čovdosiid dakkár hástalusaide maiguin máŋggat duojárat ja sámi ealáhusat odne rahčet. Dasa gullet earret eará ráddjejuvvon márkanvejolašvuođat, erohusat riikkalaš njuolggadusain, rádjehehttehusat, ja eanet ja eanet gálvvut mat leat inspirerejuvvon sámi kultuvrras muhto maid eai leat sápmelaččat dahkan. Dákkár hástalusat dagahit kundariidda váttisvuođaid dovdat eakti Sámi duoji ja nie váikkuhit Sámi kultuvrralaš birgejumi ceavzilvuhtii.
Dát hehttehusat sáhttet maiddái váikkuhit nuoraide go jurddašit boahttevuođa plánaid ja sámi árbevieruide vuođđuduvvon vejolašvuođaid. Sápmái Buorrin ulbmil lea doarjut gievrrat fitnodatdili ovdáneami, álkidahttit riikkarájahis ovttasbarggu ja váikkuhit ekonomalaš árvoháhkamii sámi servodagain.
– Eanas oassi min fitnodagain ellet sámi kultuvrras, ja go sámi buktagat bohtet oidnosii stuorát márkaniin, de máhcahuvvo ruđalaš árvu min iežamet servodagaide. Dáinna lágiin sámi kultuvra duddjo birgejumi otnážii ja seammás suodjala min kulturárbbi boahttevaš buolvvaide, dadjá prošeaktajođiheaddji Enni Similä.
“Sápmái Buorrin ulbmil lea doarjut gievrrat fitnodatdili ovdáneami, álkidahttit riikkarájahis ovttasbarggu ja váikkuhit ekonomalaš árvoháhkamii sámi servodagain.”
Gurssat, resideanssat ja pilohtta gávpogat
Golmma jagi prošeaktaáigodagas čađaha Sápmái Buorrin doaimmaid mat čalmmustahttet máhttohuksema, ovttasbarggu ja buoridit sámi buktagiid oinnolašvuođa. Sámi fitnodagat bovdejuvvojit searvat bargobájiide ja čoahkkimiidda, sihke fysalaččat ja digitálalaččat. Vuosttaš čoahkkin dollojuvvo Ohcejogas geassemánus 2026 ja dasa gullet fáttát nugo buktagiid govven ja ovdanbuktin ja fitnodatprofiillaid márkanastin.
Prošeavttas ásahuvvo maiddái ruovtturesideanssa prográmma duojáriidda ja Sámi fitnodatdolliide, man bokte oažžu praktihkalaš neavvagiid gávppašeami ja beaivválaš ealáhusdoaimmaid birra.
Dasa lassin válljejuvvojit golbma pilohtta gávpoga, okta guhtege riikkas. Dáin báikkiin galgá prošeakta bargat báikkálaš ovttasbargoguimmiiguin nannen dihtii Sámi Duodji ja Sámi Made buktagiid oinnolašvuohta buvddain, hoteallain, kulturbáikkiin ja eará relevánta arenain.
Prošeaktajoavku
Prošeavtta ollašuhttima várás lea ásahuvvon rádjáidrasttildeaddji joavku.
Prošeaktajođiheaddji: Enni Similä (SU)
Prošeaktabargit: Emmi Nuorgam (SU), Sanne-Ristin Bengtsson (RU), Johanna Tjäder (RU), and Mariann Josefsen (NO)
Sápmái Buorrin doaibmá skábmamánus 2025 gitta golggotmánnui 2028.
Čuovo ođđasiid:
Instagram: @samitrademarks
Facebook: https://www.facebook.com/samitrademarks
Website: www.samitrademarks.com
Prošeavtta ruhtadit:
Interreg Aurora; Sámediggi Norggas; Lapin Liitto; Finnmárkku, Romssa, Nordlándda ja Trøndelága fylkkasuohkanat; Barentsčállingoddi; Region Norrbotten; Västerbotten; Jämtland Härjedalen; Västernorrland.