Sámiráđđi lea rahpan Dalán-doarjaga nuppi ohcanjorrosa
Sámiráđđi lea rahpan Dalán-doarjaga nuppi ohcanjorrosa ja bovde dál sámi dáidda- kultursuorggi ohcat doarjagiid. Dalán-doarjaga sáhttá ohcat Sámiráđi neahttasiidduin elektrovnnalaš ohcanskoviin 14.9.2025 dii 23:59 (CEST) rádjái. Dalán-doarjaga njuolggadusaide sáhttá oahpásnuvvat Sámiráđi neahttasiidduin.
- Dalán-doarjja lea ođđa doarjjahápmi, mii almmustahttojuvvui jagi álggus. Mii oaččuimet vuosttaš ohcanjorrosis eanet ohcamušaid go leimmet vuordán. Dát muitala ahte olbmot leat gávdnan min ođđa doarjjahámi bures. Mii vuordit stuora beroštumi maid nuppi ohcanjorrosis, gávnnaha Sámiráđi kulturčálli Unna-Maari Pulska.
Mii Dalán-doarjagiid?
Dalán-doarjja almmustahttojuvvui jagi álggus. Dat lea hábmejuvvon doarjut sámi dáidda- ja kultursuorggi vuorddekeahtes, hohpolaš ja dihto áigemearrái čadnon dáhpáhusain. Dalán-doarjaga sáhttá oažžut eanemustá 20 000 NOK. Dalán-doarjja ii juolluduvvo investeremiidda, iige doaimmaide, mat leat juo ollašuvvan.
Sámiráđđi juohká Dalán-doarjagiid lassin prošeaktadoarjagiid, mátkestipeanddaid ja jagi guhkkosaš bargostipeanddaid. Jahkásaš doarjagiid ohcanáigi lea bárrásii maid jođus ja daid ohcanáigi nohká 2.11.2025. Kulturdoarjagiid juohkimis mearrida Sámiráđi kulturlávdegoddi.
Vuosttaš ohcanjorrosis Dalán-doarjja juolluduvvui earret eará Laila Labbai. Dalán-doarjagiin son beasai oassálastit su ja Ulivia Uviluk "ᐃᖃᓪᓕᐊᒋᐊᓯᕗᒍᑦ / Vulge oaggut / Going Fishing" -čájáhusa rahpandoaluide Montrealis, Kanádas. Govas Ulivia Uviluk ja Laila Labba čájáhusaska rahpandoaluin.
Govvejeaddji: Saali Kuata