Bálkáhuvvon oahpahallivirggit Sámiráđis
Govva: Jannie Staffanson
Leatgo ohcamin riikkaidgaskasaš bargovásáhusa EU guoskevaš áššiin? Dalle lea dát erenoamáš buorre vejolašvuohta dutnje!
Sámiráđđi ja Suoma Sámi Nuorat seearvi leat ohcamin golbma oahpahalli bargat 100% virggiin Interreg prošeavttas “Filling the EU-Sápmi knowledge gaps”. Mii virgádat ovtta oahpahalli guđege riikkas (Norga, Ruoŧŧa ja Suopma). Bargobáiki lea ovtta Sámiráđi doaimmahagain.
– Oassin min Interreg prošeavttas Sámiráđđi ja Suoma Sámi Nuorat ohcat movttegis evttohasaid min oahpahalliprográmmii, muitala Niila Inga guhte lea “Filling the EU-Sápmi knowledge gaps” prošeavtta jođiheaddji.
Juohke oahpahállái nammaduvvo bagadalli muhtin Sámiráđi ossodagain. Bagadalli galgá oahpistit oahpahalli dihto bargguid bokte, muhto maiddái oppalaččat Sámiráđi bargguin.
– Sámiráđđi ovddida sámi áššiid EU vuogádagas lassin eará riikkaidgaskasaš riikkadási bargguide. Oahpahalliprográmma ulbmilin lea ovdánahttit nuorra sámi diplomáhtaid ja fállat sidjiide riikkaidgaskasaš bargovásáhusa ovtta máilmmi boarrásamos eamiálbmotorganisašuvnnas, dadjá Inga.
Gii sáhttá ohcat?
Sápmelaš guhte háliida riikkaidgaskasaččat bargat sámi guoskevaš áššiiguin.
Oahpahalliprográmmas ii leat ahkerádji.
Lea ovdamunnin jus ohccis lea beroštumi EU ja riikkaidgaskasaš áššiin. Buorit ovttasbargoattáldagat, gulahallančehppodat, buorre čállindáidu ja iešheanalašvuohta maid deattuhuvvo. Gáibiduvvo ahte ohcci bures hálddaša sihke sámegiela ja eŋgelasgiela, sihke čálalaččat ja njálmmálaččat.
Oahpahalliprográmma lea rabas sápmelaččaide geat lea gazzamin oahpu dahje leat juo geargan oahpuiguin ja geat háliidit bargat sámi áššiiguin EU konteavsttas.
Áigemearri ohcat lea 15.8.2020 ja oahpahalliáigodat álgá 1.1.2021 ja bistá 30.11.2021. Loga lasi oahpahalliprográmmas ja mo galgá ohcat dáppe.