Sámiráđi kulturdoarjagiid ohcanáigi jahkái 2026 lea álgán
Ijahis idja 2022. Foto: Saami Council.
Sámiráđi kulturdoarjagiid jahkásaš ohcanáigi lea rahpasan, ja Sámiráđđi bovde dál sámi kultursuorggi ohcat doarjagiid jahkái 2026. Dán ohcanjorrosis sáhttá ohcat prošeaktadoarjaga, mátkestipeandda dahje jagi guhkkosaš bargostipeandda. Sámiráđđi doarju sihke árbevirolaš ja ođđaáigásaš kulturdoaimmaid.
Kulturdoarjagiid ohcanáigi nohká 2.11.2025 dii 23:59 (CEST). Kulturdoarjagiid galgá ohcat elektrovnnalaš ohcanskoviin Sámiráđi neahttasiidduin. Sámiráđi kulturdoarjagiid juohkimis mearrida Sámiráđi kulturlávdegoddi.
Ohcanskovit leat oažžumis dál maid lulli-, julev-, nuortalaš- ja anárašgillii
Sámiráđi ohcanskovit leat ođasmahttojuvvon ja vuosttaš geardde ohcamuša sáhttá deavdit dál maid lulli-, julev-, nuortalaš- ja anárašgillii. Ovdal ohcanskovit leat leamaš davvisáme-, suoma-, eaŋgalas- ja dáro- dahje ruoŧagillii.
- Mii illudit almmuhit, ahte ohcanskoviid sáhttá dál deavdit davvisámegiela lassin maiddái njealje eará sámegillii. Sámiráđi kulturdoarjagat leat oaivvilduvvon olles Sápmái ja buot giellojovkuidasamet. Go ohcanskovit leat máŋgga sámegillii, mii sáhttit bálvalit Sámi viidábut. Mii sávvat, ahte ohccit gávdnet jorgaluvvon ohcanskoviid ja ahte mii oažžut ohcamušaid maiddái dáidda gielaide, gávnnaha Sámiráđi kulturčálli Unna-Maari Pulska.
Lassedieđut:
Unna-Maari Pulska
Kulturčálli
unnamaari(at)saamicouncil.net