Kulturdoaimmat

Kulturossodaga ulbmilin lea ovddidit sámi kultuvrra ja lasihit dieđiheame dan birra. Sámiráđi kulturbargu iešas kulturlávdegottiinis gullá struktuvrralaččat kulturossodaga vuollái. Kulturossodaga doaimmas vástida ossodathoavda. Son vástida ossodaga ekonomiijas, son válbme áššiid kulturlávdegoddái, bargolávdegoddái ja Sámiráđđái, son vástida oktavuođain sámiid dáidda- ja kulturorganisašuvnnaide, kulturáššiid dieđiheames ja álgoálbmogiid kulturoktasašbarggus.

Kulturlávdegoddi  vástida sámiid kulturdoarjjaortnegis, maid ruđat kanaliserejuvvojit Sámiráđi bokte kultureallima geavahussii. Dat bargá ovttas Sámiráđiin ovddidan dihte sámekultuvrra viiddis kulturáddejumi vuođul, masa gullá maid ávnnaslaš vuođđu. Kulturpolitihkalaš doaibma sisdoallá sámi servodat eallima seailluheame ja ovddideame oppalohkái ja sierra kultursurggiid seailuma ja ovdáneame (omd. árbevirolaš ja ođđaáigásaš dáidda, duodji, girjjálašvuohta, musihka, valáštallan, girjerádju, arkiiva ja musea dahje dološ muittuid seailujupmi). Kulturlávdegotti doaimmas lea dehálaš nannet sámegiela saji, ovddidit kultuvrra ja dieđihit sámiid ja sin dili birra. Kulturlávdegoddi doaibmá oktasaš orgaanain Sámiráđi ja Sámi dáiddariid ráđi, sámi dáidda- ja kulturservviid ja eará áššálaš dáidda- ja kulturservviid gaskkas.

Kulturossodaga doaimma ruhtada Davviriikkaid ministtaráđđi. Ministtarráđi juolludan doarjaga hálddaša kultulávdegoddi. Jagis 2008 ossodaga bušehtta lea 253 000 euro.

Kulturdoarjja. Jagis 2008 juhkkojuvvojit guokte bargostipendda ja okta oahppomátkestipenda ja prošeaktadoarjja. Bušehttas juhkkojuvvo kulturdoarjjan oktiibuot 120 000 euro.

Girjebálkkašupmi. Sámiráddi juohká girjebálkkašumi juohke nuppi jagi. Jagis 2009 bálkkašupmi addojuvvo rávesolbmuid girjái. Bálkkašumi sturrodagas dahkkojuvvo mearrádus maŋŋá.

Gudnebálkkašupmi. Gudnebálkkašupmi addojuvvo juohke njealját jagi. Bálkkašupmi addojuvvo olbmui, searvái, organisašuvdnii dahje lágádussii, mii ánssaša erenoamáš gudni sámiid buorrin dahkkon barggu ovddas. Sámiráddi bivdá evttohusaid gudnebálkkašumi oažžun.

Lásságámmi. Sámiráŋis lea ovddastus Lásságámmi ásahusa ráđđehusas. Ásahus joatká Áillohačča árbbi ovddosguvlui doalvuma.