KulturSámi doarjjacealkámuš Fovsen-Njaarken Sïjtea beales ja doarjjabivdda min buot kultursuorggi kollegaide!
KulturSápmi doarju Fovsen-Njaarken Sïjtea ja buot dáistalemiid, mat suddjejit min eatnamiid, čáziid ja kulturvuođu boahttevaš buolvvaide. Mii hástalit buot našunála kulturásahusaid doarjut KulturSámi cealkámuša, vai davviriikkaid eiseválddit gudnejahttet Sápmelaččaid vuoigatvuođaid! Vuolláičále min cealkámuša dáppe.
Dát lea oktasaš sámi kultursuorggi, KulturSámi, cealkámuš ja doarjjabivdda buot min kultursuorggi kollegaide!
Sámi dáiddárat leat leamaš álo ovddemusas dáistaleame min álbmoga, kultuvrra, gielaid ja kultuvrra hárjeheami ceavzima beales. Sisabahkkemat leat lassánan ja sturron, mii mearkkaša, ahte máŋggat dáiddárat ja kultuvrra hárjeheaddjit leat šaddan gaskkalduhttit árgabeai’ eallimiiddiset, vai sii sáhttet dáistalit vuođđovuoigatvuođaid beales.
Sámi kultursuorgi, KulturSápmi, bivdá min kollegain davviriikkalaš kultursuorggis doarjaga ja solidaritehta dáistaleapmái olmmošvuoigatvuođaid, riektesihkkarvuođa ja sámi álbmoga eatnamiid ja čázi gudnejahttima beales.
Sámi kultuvra lea sorjavaš min eatnamiin, mat hábmejit min kultuvrra lunddolaš vuođu. Áitagat, mat čuhcet min eatnamiidda, áitet dakko bokte olles sámi dáidda- ja kultursuorggi boahtteáiggi. Sámi eatnama áitet čađat sisabahkkemat, mat váttásmahttet min kultuvrra hárjeheami ja sámenuoraid movttiidahttima sirdit árbedieđu. Oktasaš sámi kultursuorgi addá dievas doarjaga aktivisttaide ja dáiddáriidda, geat dáistalit sámiid olmmošrivttiid beales.
Nuorra filbmadahkki Mihkkal Hætta fárrii čakčamánu 11. beaivve lávvui Norgga stuoradikki ovdii vuostálastin dihte olmmošrivttiid loavkideami, mii lea jođus Fosenis. Badjel 10 jagi Ruoŧa beale Sámi sápmelaččat leat dáistalan eiseválddiid ruvkedoaibmalobi vuostá Gállokis. Jåhkågasska ja Sirges čearru leat dál alimus rievttis Ruoŧa eiseválddiid vuostá dáistaleame boazodolliid beales. Ja máŋggat, máŋggat sullasaš dáhpáhusat leat jođus dál miehtá Sámi. Sisabahkken Sápmái dagaha bissovaš vahágiid sámi kultuvrra vuđđui. Deaddu lea stuoris ja das leat stuora váikkuhusat mielladearvvašvuhtii.
Duohtavuođa- ja seanadanbargu lea jođus Davviriikkain. Sámeálbmogii ovdal čuohcán boasttogeavaheamit buktojuvvojit ovdan ja daidda čujuhuvvo fuomášupmi. Dát lea buorre ášši. Duohtavuođa- ja seanadanbarggu olis sápmelaččaid ealáhusat ja kulturdoaimmat leat goittotge ain stuorit deattu vuolde. Dalle šiitemeahttun seanadeapmi šaddá dušše guoros sátni. Seanadandoaimmaid sadjái mii vásihit ođđa boasttugeavahemiid.
KulturSápmi doarju dáistaleami min álbmoga rievttis hárjehit kultuvrra, rievttis eatnamii ja čáhcái. KulturSápmi bivdá Davviriikkaid eiseválddiid gudnejahttit sámiid olmmošrivttiid.