ONa eamiálbmotáššedovdi orgána galleda Norgga
ON eamiálbmotvuoigatvuođaid áššedovdimekanisma (EMRIP) galleda dán vahkus Norgga geahčadit movt sámiid vuoigatvuođat fuolahuvvojit sisabahkkemiid oktavuođas.
Galledeapmi dáhpáhuvvá Sámiráđi jearaldaga vuođul ovttasbarggus Norggabeal Sámedikkiin, áigodagas njukčamánu 8.-14. b. 2024. Galledeami boađusin šaddá raporta mas leat rávvagat dasa mo Norga berre vuhtiiváldit eamiálbmogiid vuoigatvuođaid nationála lágaid bokte.
– Lea vuosttaš geardi go áššedovdimekanisma virggálaččat galleda Norgga, ja galledeami ulbmil lea earret eará oažžut rávvagiid das mo friija, ovddalgihtii ja informerejuvvon miehtan (FPIC) vuoigatvuođa sáhttá čađahit Norgga lágain. Deaŧalaš lea ahte áššedovdimekanisma beassá deaivvadit ja ságastallat sámi servodagain, riekteguddiin, iešguđeteiseváldiovddasteddjiiguin, ja priváhta suorggi ovddasteddjiiguin, dadjá Eirik Larsen, Sámiráđi olmmošvuoigatvuođaossodaga jođiheaddji.
Erenoamáš beroštupmi sisabahkkemiidda sámi guovlluin
ON lea dovddahan ahte sii háliidit gullat mo sisabahkkemat váikkuhit sámi servodahkii, ja sámi servodaga vásáhusaid konsultašuvdnalágain, plána- ja huksenlágain, ja maiddái energiija- ja minerálalágain.
– Sisabahkkemat sámi guovlluin leat áššelisttus, ja mii áigut fitnat Lágesvuonduoddaris ja Rásttigáisás, Nussiris ja Riehpovuonas, ja bieggaindustriijaguovllus Fovses. Dasto šaddet čoahkkimat sihke guoskevaš sámiiguin, gielddaiguin ja industriijain. Mii leat máŋggaid jagiid bargan olahit dán galledeami, ja duogáš dasa lea dat issoras olu bahkkematlundui ja nu áittan sámi kultuvrra vuđđui. Mis lea doaivva ahte ON ávžžuhusat sáhttet leat mielde buorideamen Norgga lágaid ja váikkuhit dasa ahte mii eat goassege šat vásit Fovse-ášši sullasačča, dadjá Larsen.
Dá lea olles prográmma:
| Bear. Njuk. 8. b. |
Kárášjohka: Bures boahtin ja gulahallan gaskal EMRIP, Sámiráđi, Sámedikki ja ráđđehusa |
| Láv. Njuk. 9. b. |
Báikediđoštallan Lágesvuonduoddaris/Rásttigáisá-guovllus: Čoahkkimat riekteguddiin, eiseválddiiguin ja industriijain. |
| Sotn. Njuk. 10. b. |
Báikediđoštallan Nussiris ja Riehpovuonas: Čoahkkimat riekteguddiin, eiseválddiiguin ja industriijain. |
| Vuos. Njuk. 11. b. |
Siskkáldas čoahkkin, ON eamiálbmotvuoigatvuođaid áššedovdimekanisma |
| Maŋ. Njuk. 12. b. |
Báikediđoštallan Fovses: Čoahkkimat riekteguddiin, eiseválddiiguin ja industriijain. |
| Gask. Njuk. 13. b – Duor. Njuk. 14. b. |
Oslo: 1) Čoahkkimat Oslos: NIM, Statkraft ja Fovse-akšunisttaiguin 2) Gulahallan gaskal EMRIP, Sámiráđi, Sámedikki ja ráđđehusa Gielda- ja guovlodepartemeantta, Energiijadepartemeantta, Ealáhus-, industriija- ja guolástusdepartemeantta ja Olgoriikadepartemeantta bokte. |
EMRIP birra:
EMRIP lea ráđđeaddi orgána ON Olmmošvuoigatvuođaráđđái, ja dan mandáhtta lea rávvet stáhtaid lágaid ja politihka birra mat gusket eamiálbmogiid vuoigatvuođaide, dás maiddái čađahit riikkagalledemiid ja láhčit gulahallama gaskal stáhtaid, eamiálbmogiid ja priváhta suorggi.