Sámiráđđi ovttas Suoma Sámiid Guovddášservviin álggaha Interreg prošeavtta
Gurut bealde olgeš guvlui: Åsa Larsson Blind (Prošeaktajođiheaddji RU), Enni Similä (prošeaktamielbargi SU), Simon Lundmark Kuhmunen (prošeaktamielbargi RU), Helene Ajuna Olsen (Gulahallanráđđeaddi NO) Govva: The Saami Council // Piera Heaika Muotka
Sámiráddi ovttas Suoma Sámiid Guovddášservviin lea álggahan Interreg prošeavtta “ReCap ASáp: Regaining capacity in a changing Sápmi”. Prošeavtta jođiha Åsa Larsson Blind ja mielbargin leat Simon Lundmark Kuhmunen, Enni Similä, ja Helene Ajuna Olsen. Prošeakta galgá hukset ja nannet kapasitehta Sámi searvodahkii.
“Nana ja dávggas Sápmi johtilis rievdadusaid áiggis”
– Mun illudan prošektii man ulbmil lea buoridit gelbbolašvuođa Sámis boahtte golmma jagis. Prošeaktadoaimmat nannejit sámi servodaga ja addet sámi organisašuvdnaide buoret vejolašvuođaid váikkuhit áššiin mat sidjiide leat dehálaččat, dadjá prošeaktajođiheaddji Åsa Larsson Blind.
“ReCap ASáp: Regaining capacity in a changing Sápmi” lea golmmajahkásaš prošeakta mii galgá nannet sámi servodaga doaimmaid bokte mat ovddidit jođiheami, ja ovddidit ja juogadit máhtolašvuođa. Prošeaktaguoimmit leat Sámiráđđi ja Suoma Sámiid Guovddášsearvi (SSG).
– SSG:s mii leat hui ilus go beassat leat oassin dán prošeavttas ja doaimmain mat dan olis doaimmahuvvojit. Dat addet buori bargoneavvuid maid SSG:i vai mii sáhttit doaibmat beaktilit Suoma bealde gáhttoorganisašuvdnan. Erenoamáš ilus leat go prošeakta háliida hukset gelbbolašvuođa sámi organisašuvnnain ja čalmmustahttit nuoraid ja vuorrásiid, go mii oaidnit stuorra dárbbu máhttu sirdimii dán suorggis, dadjá Suoma Sámiid Guovddášsearvvi jođiheaddji Janne Näkkäläjärvi.
Janne Näkkäläjärvi (SSG jođijheaddji), Enni Similä (prošeaktamielbargi), Åsa Larsson-Blind (prošeaktajođiheaddji), Simon Lundmark Kuhmunen (prošeaktamielbargi), Áile Javo (Sámiráđi váldočálli)
Jođánis rievdadusat, ovdamearkka dihte dat maid dálkkádatrievdan dagaha, čuhcet sámi servodahkii sihke njuolga ja eahpenjuolga doaimmaid bokte maid servodagat birrasis čađahit. Prošeakta váikkuha dasa ahte Sápmi šaddá nanus ja dávggas dakkár áiggis mii rievdá jođánit, ja dat nanne Sámi siviilaservodaga návccaid ovddidit iešmearrideami.
Golggotmánu álggus deaivvadedje prošeaktaguoimmiid ovddasteaddjit, Janne Näkkäläjärvi (SSG) ja Áile Javo (Sámeráddi), prošeaktamielbargiiguiin Heahtás, Suoma bealde Sámis.
Prošeavtta leat ruhtadan Interreg Aurora, Sametinget i Norge, Lapin Liitto, Finnmark, Troms, Nordland ja Trøndelag fylkeskommuner, Region Norrbotten, Västerbotten, Jämtland Härjedalen ja Västernorrland.