Sámi gálvomearkkat ožžot ođđa neahttasiidduid
Sámi gálvomearkkat -prošeavtta oktavuođas almmustahttojuvvojit sámi gálvomearkkaide ođasmahttojuvvon neahttasiiddut 18.10.2023. Prošeaktajođiheaddji Reetta Tornensis muitala, man dehálaš lea, ahte neahttasiiddut doibmet bures, vai sápmelaččain lea álki gávdnat dieđuid gálvomearkkain, ohcat liseanssaid ja ahte maiddái olggobeale olbmot gávdnet duojáriid ja sámi fitnodagaid.
Prošeavttas lea dál jođus vuosttaš muddu, man ulbmilin lea juohkit sámi servodahkii dieđuid gálvomearkkain ja movttiidahttit duojáriid ja sámi fitnodagaid ohcat gálvomearkaliseanssa. Sámi gálvomearkkaid sáhttá ohcat digitálalaččat čujuhusas www.samitrademarks.com.
– Lea dehálaš, ahte sápmelaččat ohcet, geavahit ja čalmmustahttet sámi gálvomearkkaid, vai olbmot servoša olggobealde gávdnet sámi buktagiid, go mátkkoštit Sámis. Dát lea eaktu dasa, ahte Sámi gálvomearka -prošeakta lihkostuvvá, dadjá prošeaktajođiheaddji Reetta Tornensis.
Sámi gálvomearkkaid ohcanáigemearit
Sámi duoji liseansakantuvrrat Duodjeinstituhtta ja Sámi Duodji Sameslöjdstiftelsen meannudit Sámi Duodji -mearkka ohcamušaid Norgga ja Ruoŧa bealde golggotmánus 2023 ja čuovvovaš háve giđđat 2024. Sámi Duodji rs Suoma bealde meannuda Sámi Duodji -mearkka ohcamušaid boahtte skábmamánu loahpas. Dán jagi ohcanáigi nohká 13.11.2023. Sámi Made -mearkka sáhttá ohcat goas beare ja Sámiráđđi gieđahallá daid ohcamušaid oktii mánus.
– Mii ávžžuhit laktit ohcamuššii čáppa ja alladásat govaid, vai dujiin oažžu buoremus vejolaš ipmárdusa ja gova. Lea dehálaš, ahte neahttasiiddut geasuhit ja ahte olbmuin lea álki gávdnat dieđuid gálvomearkkain ja ohcat liseansasertifikáhtaid. Dát lea dehálaš, vai gálvomearkavuogádat doaibmá vuogálaččat ja bálvala sámi servodaga, muitala Tornensis.
Sámi gálvomearkkat -prošeavtta čuovvovaš lávkki guovddážis lea duoji ja sámi buktagiid márkanfievrrideapmi riikkaidgaskasaš arenain. Ođasmahttojuvvon neahttasiidduin lea diehtovuođđu, gos gávdnojit sihke duojárat ja sámi fitnodagat. Guđege Sámi Made ja Sámi Duodji -mearkka liseansageavaheaddjis lea neahttasiiddus iežas profiila, gosa sii sáhttet lasihit govaid iežaset dujiin ja čállit dieđuid iežaset fitnodagas, dujiin dahje buktagiin. Dán ulbmilin lea nannet sámi fitnodagaid gilvofámu máilmmis.
– Neahttasiiddut leat dehálaš oassi márkanfievrrideamis ja mii háliidit, ahte áššehasain lea álki gávdnat sámi fitnodagaid ja duojáriid ja sin buktagiid. Sámi Made -mearkka liseansageavaheddjiid mearri lea lassánan jođánit. Sámi Made -mearkka geavaheaddjit fállet sámi buktagiid, dego biktasiid, čiŋaid, digitála buktagiid ja borramušgálvvuid. Maiddái vuosttamuš Sámi Duodji -mearkka geavaheaddjit lasihuvvojit diehtovuđđui dađistaga, go liseansakantuvrrat gieđahallet ohcamušaid. Dát mearkkaša dan, ahte árbevirolaš sámi duoji fállu maid lassána, muitala Tornensis lohppii.
