Sámiráđđi doarju Fovse-miellačájehemiid Oslos
Cealkámuš Sámiráđi čoahkkimis Árjepluovves, golggotmánu 14. b. 2023.
Lea gollan badjelaš guokte jagi das rájes go Norgga Alimusriekti stuorrakámmaris celkkii ahte bieggafápmorusttegat Storheias ja Roanis rihkkot Fovse-sámiid olmmošvuoigatvuođaid ON sivila- ja politihkkalaš vuoigatvuođaid konvenšuvnna 27. artihkkala mielde. Luondu, eatnamat ja čázit leat vuođđun sámi kultuvrii. Danin sisabahkkemat áitet sámi kultuvrra ceavzima.
Golggotmánu 11. b. 2023 ledje olmmošvuoigatvuođasuodjaleaddjit fas čoahkkanan Oslo gáhtaide, gos čađahedje máŋga akšuvnna Norgga stáhta ja stáhtaoamastuvvon energiijafitnodaga Statkraft vuostá, vuostálastin dihtii dan olmmošvuoigatvuođarihkkuma mii dál dáhpáhuvvá Fovses. Dát akšuvnnat leat dagahan ahte Norgga ráđđehus lea dovddastan olmmošvuoigatvuođarihkkuma, ja lea šállošan dan. Liikká ii leat ráđđehus, ii ge bieggafápmoindustriija ieža, bissehan olmmošvuoigatvuođarihkkuma.
Sámiráđđi doarju min nuoraid akšuvnnaid ja buohkaid geat leat searvan Fovsen-Njaarke sámiid olmmošvuoigatvuođaid bealušteapmái. Mii gáibidat ahte Norgga ráđđehus árvvusatná Alimusriekteduomu ja riektestáhta, ja ahte ráđđehus dakkaviđe bidjá johtui doaibmabijuid bissehan dihtii olmmošvuoigatvuođaid rihkkuma.