Sámiráđđi lea duhtavaš go Apple láhčá dili sámegielaide iOS:s

Ođđa iPhone ja iPad iOS 17.2 ođasmahttima fárus lea Apple lasihan doarjaga gávcci sámi gillii, earret eará sámi boallobeavddit ja vuogádaga UI-gielaide. Sámiráđđi ja Divvun-joavku leat dorjon Apple dán barggus. 

Smávva álgoálbmotgielain, dego sámegielain, leat hástalusat otna digitála máilmmis, mii ovdána jođánit. Dain váilot dávjá buorit digitála reaiddut ja čovdosat mat stuorat gielain leat. Dát hástalus hehtte sihke gielaid beaivválaš geavaheami ja ceavzima. Vai ealli giella galgá seailut ja ovdánit dálá servodagas, de fertejit gielat oažžut vejolašvuođa geavahuvvot maid digitála arenain. 

– Mii háliidit rámidit Apple go leat vuoruhan dán barggu, ja mii sávvat ahte dat sáhttá leat buorre ovdamearkan eará stuora teknologiijafitnodagaide máilmmis. Jus mii áigut sihkkarastit ahte álgoálbmotgielat ovdánit ja cevzet, de mii dárbbašit máilmmiviidosaš teknologiijafitnodagaid heivehit bálvalusaideaset ja buktagiiddiset nu ahte dat dorjot smávva álgoálbmogiid gielaid, nugo sámegielaid, cealká Sámiráđi presideanta Áslat Holmberg.

Máŋga jagi lea UiT Norgga árktalaš universitehta Divvunjoavku fállan app-čovdosa Sámi boallobevddiide iOS:s (Divvun tastaturer App Store:s). Dát lea dagahan vejolažžan geavahit sámegielaid olu iOS-geavaheddjiide, muhto das leat diehttelasat leamašan muhtin ráddjejumit.

Ođasmahttin siskkilda maid doarjaga buot sámi bustávaide dárogiela, ruoŧagiela ja suomagiela boallobevddiin. Dát lea dehálaš earret eará sihkkarastin dihte ahte sámi báikenamaid sáhttá čállit riekta eanetlogugielaid boallobeavddiin.

– Lean earenoamážit ilus go Apple lea nagodan juolludit doarjaga gávcci sámegillii, namalassii gielddasámegillii, nuortalašgillii, anárašgillii, davvisámegillii, julevsámegillii, bihtánsámegillii, ubmisámegillii ja lullisámegillii. Sávan maid ahte dát lea dušše álgu, ja ahte sihke Apple ja eará fitnodagat movttáskit vel eambbo láhččet diliid sámegielaid geavaheapmái, Holmberg loahpaha.