AHR ođasmahttá olmmošvuoigatvuohtarihkkuma ja bágge ii-sápmelaččaid Sámediggái
Áslat Holmberg. Govven: Sámiráđđi / Piera Heaika Muotka
Alimus Hálddahusriekti (AHR) lea ođasmahttán mearrádusaid, mat leat gávnnahuvvon rihkkut sápmelaččaid vuoigatvuođa friddja politihkalaš ortniiduvvamii.
AHR fas bágge 72 ii-sápmelačča sámedikki jienastuslohkui ja áitá ná sámedikki legitimitehta sápmelaččaid ovddastanorgánan.
– Dat lea sápmelaččaid givssideapmi. AHR diđolaččat rihkku Suoma geatnegahtti olmmošriektesoahpamušaid ja áitá Suoma jáhkehahttivuođa riektestáhtan. Dát čájeha ahte AHR dovdá iežas leat bajábealde álbmotrievtti. Dát lea buhtes koloniála váldegeavaheapmi, dadjá Sámiráđi ságadoalli Áslat Holmberg.
AHR lea rihkkon sámiid iešmearridanrievtti ja lea bággen ng. ollislaš guorahallama bokte láddelaččaid Sámedikki jienastuslohkui. AHR:s ii leat gelbbolašvuohta árvvoštallat olbmo sápmelašvuođa ja ollislaš árvvoštallan lea gávnnahuvvon leat mielaevttolaš ja rihkkut riikkaidgaskasaš rievtti (Nállevealahankomitea: 59/2016 ja Olmmošvuoigatvuohtakomitea: 2668/2015). AHR lea juo gávnnahuvvon dáid mearrádusaiguin sivalažžan nállevealaheapmái ja lea geanohuhttán sámedikki vejolašvuođa duođalaččat ovddastit sápmelaččaid ja sin ovdduid.
– Lea áddetmeahttun, ahte AHR ođasmahttá rihkkuma. Áidna vuohki Supmii gádjut iežas ámadaju lea ođasmahttit ovdal ođđa válggaid sámediggelága, mii mielddisbuktá rivtiid rihkkumiid. Muđuid duššadit resurssaid lágidemiin válggaid, mat eahpitkeahttá dolvot min dillái, mas sámediggi ii dievas legitimitehtain ovddas sápmelaččaid. Justa dál dovdo ahte mii eallit riikkas mii fal bilkida riektestáhta prinsihpaid, Holmberg loahpaha.
Sámiráđi várrepresideanta ja Ruoŧa ossodaga jođiheaddji Åsa Larsson Blind čuoččuha:
– Riekti meroštallat iežamet friddja politihkalaš ovddastusa lea oassi álgoálbmogiid iešmearridanrievttis. Dát vuoigatvuohta loavkiduvvo Suomas dáinna mearrádusain. Vuoigatvuohta meroštallat sámedikki válgalogahallama eavttuid lea sápmelaččaid siskkáldas ášši. Mis galget leat miehtá Sámi juohke riikkas sámedikkit, mat legitiimaččat ovddastit sápmelaččaid.