Jevgenij Jushkov:a Muittofoandda almmuhus – Stipeandaohcan 2024
Govva: Sámiráđđi
Sámiráđđi lea ásahan muitofoandda gudnin atnit Jevgenij Jushkova doaimma ja eallima. Foandda ulbmil lea movttiidahttit ja doarjut Ruoššabeal’ sámiid geat háliidit čađahit sámegieloahpahusa.
Oahpahus sáhttá leat buot 10 sámegielain, ja sáhttá čađahuvvot Suomas, Norggas, Ruoššas dahje Ruoŧas. Doarjja sáhttá adnot oahppodoarjjan, oahpponeavvuid oastin doarjjan dahje oahpahussii gullevaš goluid gokčamii.
Mii almmuhit vuosttaš stipeandaohcamiid vuoru. Oanehis motivašuvdnareivve mas čilgejit oahppoplánaid ja goluid mat dasa gullet, sáhttá sáddet čujuhussii:
Ohcanáigemearri: Guovvamánu 29. b. 2024
Fuomáš ahte dušše Ruoššabeal’ sámit sáhttet ohcat stipeandda. Organisašuvnnat dahje ásahusat eai sáhte ohcat doarjaga. Muitofoandda stivra gieđahalla ohcamušaid. Ohccit ožžot dieđu mearrádusa čálalaš hámis. Mearrádusaid ii sáhte váidalit.
Dehálaš dieđut: Sámiráđđi ii sáhte sirdit ruđaid Ruošša báŋkukonttuide geopolitihkalaš dili ja gáržžidemiid geažil.