Sámiráđđi nanne barggu birasgažaldagaiguin

Sámiráđđi lea virgádan Julius Mihkkal Lindi Kárášjogas prošeaktaráđđeaddin Sámiráđi Árktalaš ja birasossodahkii. Julius šaddá sáttagotti jođiheaddjin Árktalaš ráđi bargojoavkkus, Arctic Contaminants Action Program (ACAP), ja co-chair Indigenous Peoples’ Contaminant Action Program (IPCAP) áššedovdi joavkus.

Su ovddasvástádus lea earret eará buoridit Sámi álbmoga oassálastima Árktalaš ráđi Solid Waste Management nammasaš prošektii.

Son lea doaibman aktiivvalaččat riikaviidosaš sámi nuoraidorganisašuvnnas Norggas, Noereh:as jagi 2020 rájes ja lea dál stivrra nubbinjođiheaddji. Son lea bajásšaddan Kárášjogas, Norgga bealde Sámis, ja lea lohkkamin Master-dutkosii fysihkkas ja matematihkkas NTNU:as.

- Mii leat hui ilolaččat go leat rekruteren Juliusa, geas lea erenoamáš gelbbolašvuohta STEM oahpus. Dát nanne min oppalaš barggu birasgažaldagaiguin ja addá midjiide ođđa perspektiivva bargui mii dahkkojuvvo ACAP:s ja IPCAP:s, dadjá Sámiráđi váldočálli Áile Javo.

Sámiráđi ovddit bargu doapparhálddašeamis, Kola Waste Project, lea čađahuvvon Guoládatnjárggas. Dan ulbmil lei "gávdnat vejolaš ja báikkálaš nuoskkideami gáldduid, buhtistit gávdnojuvvon lobihis nuoskkidemiid, ja dieinna lágiin buoridit birrasa Guoládatnjárgga sámi servodagaide (Ruošas)." Báikálaš sámit ja eará báikálaččat geat orrot dáin nuoskiduvvon guovlluin leat giitevaččat ja sin mielas bargu lea lihkosmuvván.

– Solid Waste Management šaddá lunddolaš čuovvoleapmin Guoládatnjárggaprošektii ja viiddida doapparhálddašanbarggu muđui Sápmái ja Árktalaš guvlui. Dát viiddideapmi rahpá maiddái vejolašvuođaid ovttasbargat ođđa bargoguimmiiguin ja bistevaš oasseváldiiguin Árktalaš ráđis, dadjá Julius.

– Árktalaš ráđi bargojoavkodási doaimmaid joatkima oktavuođas sávan oažžut mávssolaš doarjaga IPCAP áššedovdijovkui Solid waste management siskkobealde ja láhčit saji mávssolaš prošeavttaide min servodagas gos dákkár bargu dárbbašuvvo.